⌚⏰ إزاي ننظم وقت أولادنا بعد يوم دراسي⏰

▪- حاولي تكوني خلصتي تحضير الغدا قبل ما يوصلوا البيت.

والبيت يكون مترتب لأنه بيدي راحه نفسيه سواء للكبير او الصغير.

سيبيهم يرتاحوا شويه من مجهود المدرسه بس بلاش يناموا بالنهار عشان يناموا على الساعه 9 بالليل و يكون ده ميعاد نومهم الثابت.

▪- اسأليهم عملتوا ايه ف المدرسة طول اليوم عشان ميجيش وقت المذاكرة يقعدوا يقولوا ماما ده حصل كذا وكذا .

▪- لو بياخدوا دروس بلاش يكون بعد المدرسة على طول عشان يعرفو يركزوا ويستفيدوا.

▪- خلاص أكلوا و شربوا و أرتاحوا وجاء وقت المذاكره وخلاص مفيش حجج تانية

⬇ – وقت المذاكره :-

▪- ياريت بلاش تليفزيون مفتوح و دوشه وناس قاعده بتتكلم أكيد الولاد مش هيركزوا

▪- ظبطي مكان مريح وعوديهم يكتبوا ع مكتب او طرابيزه بلاش السرير و الأرض عشان الخط يبقى مظبوط..

▪- بيعملوا الواجب و كتبو بخط وحش امسحي الواجب و يتعاد عشان يتعودو أنهم يتقنوا اللي بيعملوه .. إن الله يُحب إذا عمل أحدكم عملا أن يتقنه .

▪- بلاش تضربي في ابنك عشان مفهمش اللي بتشرحيه

▪- مفهمش مش مشكله عيدي ..مفهمش تاني يبقى انتي مش عارفه توصلي المعلومه و شوفي طريقه تانيه وصليها بيها.

▪- لو مفهمش برضو خليه يقوم من المذاكره ياخد راحه خمس دقايق .

▪- ذاكري لهم اي ماده تانيه و أرجعي للماده اللي مش فاهمنها و اشرحيها تاني.

بس بلاش عصبيه ف المذاكره

وبلاش يا غبي و يا حمار و الكلام ده لانك كده بتقنعيه انه غبي مره ع مره هيصدقك و يستسلم و يبقى غبي بجد .

▪- لو ابنك بيتحرك كتير خليه يذاكر على مكتب و وشه ف الحيطه مفيش شباك ولا صور ولا تكون الحيطه مليانه الوان كتير يعني متخليش حاجه تجذب انتباهه.

▪اللي بتذاكريه مع ابنك خليه هو يشرحه لك و لازم تديله ثقه ف نفسه و انه يُعتمد عليه يقدر يفهمك الدرس .

أديله أي حاجه ف أيده و مثلي معاه أن ف أيده ميكرفون و أنه بيتكلم ف الإذاعه .

خليه يمثل دور المدرس و يسألك و أنت أعملي مش عارفه الحل و تسأليه و خليه هو يجاوب .

▪بين كل ساعه مذاكره اديله عشر دقائق راحه و لعب .????

▪ابتدي معاه بمذاكره الماده الصعبه بالنسبه له.

▪قولي له أنت شاطر -أحسنت – بارك الله فيك أحضنيه و بوسيه وطبطبي عليه

الكلام ده بيفرق مع الأطفال جدا .

▪ياريت لو في خروجه أخر الأسبوع كنوع من التحفيز

خليه يستمتع بوقت مذاكرته معاكي وصليه لدرجه ان هو اللي يطلب مذاكرتك معاه

نتمنى النصايح تكون عجبتكم ❤️

سنة دراسية سعيدة على الجميع و بالتوفيق لكل أولادنا ?